Mat 27 | BEF | STEP | Go'i noligo asaga sipi mono bo hiti to Isilaeli bo olopa'a hiti li nupa hilete Yesuhi ho fililana kaga lu keheli fa keheli hi'ahana.

Matthew 27

Yesuhi kibina bomofihi bulo le'mo mele'ahana

Mk 15:1; Lk 23:1-2; Jn 18:28-32

1 Go'i noligo asaga sipi mono bo hiti to Isilaeli bo olopa'a hiti li nupa hilete Yesuhi ho fililana kaga lu keheli fa keheli hi'ahana. 2 Enali seni nagatu'i Yesuhi yato naga'i ilete le'mete bite Lomu gamani bo Pailatihi sipi bo nohinamofihi emi'ahana yabe.

Yutasi fili'ehina

Apo 1:18-19

3 Yutasiu Yesuhi fateha'amagihi enayanuga li bi'ehinauba Yesuhi ka foya li etete ai ka'a li melugu malana bu go'ehina. Ya huloto ai komopa'a i gelehe huloto 30 siliba efahi legeya'a sipi mono bomagi to babafi olopa bomagi emi'ahana aku'i ito buto epi'ehina. 4 Ya huloto ai lu epi'ehina: Nani foipana ameni'ina bomofihi yato li lepiloto'ni nani'ni foipana li nubufalo molo'ohube. To ai fililina'mu yabe. Ya luto ligo enali li'ahana: Ya lalinati meni'ibe. Ya'ma kai'naka ni'ibe. 5 Ya lite lago Yutasiu ana efahi mono nohi hasagu he'mi lago notito fegutoga buto nagato ai'a naga ho'ehina.

6 Ya higo sipi mono bona'magi ana efahi lilete li'ahana: Ya'ma golaha efahi ni'ibe, mono nonugu efanugu li sibi huto malalutaya lali keya kagati o'e lu'ohutomofihi li gofa haluta'mu yabe. 7 Enali ana efa kumu kaga lite lite melelete moneko kalo li mele'ahana: Enali ana efatu'i me somo lolo hulata nohina bomofihi foya mina filete bonoho bona'i ete filise bona'magihi kene mala malaluta hepa'i li lolo hilune li'ahana yabe. 8 Ya'mu lite ya'mana me'i gi'a Golaha Me'i yabe lite gi mele'ahana yabe. Ya'mana gi'a yatai hiti helata nehabe.

9 Koyapa'i kaga lu huto huto bo Yelemaiyahi bagalo Hu'ma kaga molo'ehina yatai mana'a pa so'ehibe. Ana kaga ma luto ni'ina:Enali efahi legeya'a 30 siliba lilete ana efatoti ya'ma bo mina filuta mina'a yabe lite Isilaeli bona'magi ka mele'ahana yabe. 10 Ana efatu me somo lolo hulata bomofihi me'i Sipi Bo'niuba mina fibo luto lu nimi'ehina'a huto mina fi'ohube.

Pailatiu Yesuhi lili'na hapa'amu loka ho'ehina

Mk 15:2-5; Lk 23:3-5; Yn 18:33-38

11 Enali Yesuhi sipi Lomu gamani bomofihi bulo le'mo ho tigo ma luto loka ho'ehina: Kai Yuta bona'magi sipi gihiti bo'ani nohapihe? Ya luto loka hago Yesu lu'ehina: Kaika alu huto nohane. 12 Enali sipi mono bo hiti Yuta bo olopa bomagi hiti Yesuhi fisa ina kaga'anilo Yesu kaga nona'a meluse legeso huto mino'ehina. 13 Ya higo Pailatiu lu emi'ehina: Ma bona'magi babu kaga lite kifisa ite ka foyagu kele'me nemalana kai mekeheli'ahapihe? 14 To Yesu Pailatihi kaga'alo nona'a aku'i meluse legeso huto mino'ehina. Ya higo ya'ma sipi Lomu gamani bouba babu ekesa yigi'ehina yabe.

Pailatiu ligo Yesuhi malipu yafalo he'ahana

Mk 15:6-15; Lk 23:13-25; Yn 18:39-19:16

15 Asaga kufugu Pasa nose'na nelata nehana kanalo Lomu gamani bouba naga foyagu nehanaguti asaga boana'magi ya'muya bo li gulu ho etobo lanamofihi nagaluguti fulu ho etolata nohina yabe. 16 Ya'mana kana'alo asaga bona'magi gi'a keheli baga i'ahana bo Balabasiu nagalugu mino'ehina. 17 Asaga boana'i li nupa hago Pailatiu enoloka ho'ehina: Kiyi'afihi lepilube? Balabasihi li gulu ho etobo ya lite nekehelifi to Yesuhi li gulu ho etobo lite lilete nekehelibe? 18 Enali Yesuhi ipakafa helete neminanati ka foyalo le'mo ho ti'ahanamo ni'ibe luto Pailatiu akeheli'ohuto enoloka ho'ehina yabe.

19 Ya luto luloto Pailatiu ka foya nonugu kaba huto nominago liha'auba koko pana'aloga ma luto kaga malago ete lu emi'ahana: Kai foipana'a menina bomofihi gufalo ana'ina mone li huto mehubo. Nani yatai folugu'i ana hetofa bomofihi bamu'i bati mehina'a bu goloto'ni ai kumu nugufa'nigu sipi keta nebesi'ehibe.

20 Enali sipi mono bo hiti to Yuta olopa bomagi hiti asaga boana'i sipi ka lite enekesa bilete li'ahana: Kai Balabasihi nohe'mi etoto Yesuhi limitogo ho fililune lite lilo li'ahana. 21 To ya'ma Lomu gamani bouba ka luto enoloka ho'ehina: Ma loe bo neha'ina kiyi'afihi le'mo nagaluguti gulu ho etalube? Ya ligo enali kehe sipi ite: Balabasi yabe, li'ahana yabe. 22 Pailatiu ya lago lu epi'ehina: Ya lanagi Mesiatini ya'ma Yesuhi nani hena hu etalube? Ya luto enoloka hago asaga bona'magi sipi kehe ite li'ahana: Malipu yafalo ho filibo. 23 Ya lago Pailatiu lu epi'ehina: Hena'mube? Ai henana li sibina hu'ehibe? Ya lina kaga mekehelise enali amuya melete kehe sipi mone'a hiti ite li'ahana: Malipu yafalo ho filibo. 24 Pailatihi kaga'a asaga bona'magi ho fi telete luba li huto hilana suhi hago Pailatiu bu enogo'ehina. Ya hago ai silaga boana'i enubulo nagami'i liloto yaha'a sese nohuto ma luto lu epi'ehina: Ma bomofihi ho filise foipana kumu nani nugufalo metilibe. Ya asaga'na lenalitinilogagoko minalibe. 25 Ya ligo asaga boana'magi ai ka'alo nona'a lu emi'ahana: Ya'mana ho filise'namofihi foipanafi lali lugufalo tiloto yagapanatimagi enugufalo leheko malalina'mu yabe. 26 Ya lite lago Balabasihi gulu ho etoto le'mo epi'ehina. Ya huloto Yesuhi naga osatu bi yigiloto ho etalo luto gimi bomagi malipu yafalo halabe'mu enali enayanuga epi'ehina yabe.

Gimi bomagi Yesuhi kiya yokolo ka li ete'ahana

Mk 15:16-20; Jn 19:2-3

27 Enali Lomu gamanimofihi gimilo bomagi Yesuhi le'mete gamani nonuga le'mete netigo gimi bo ana nonuga babu lite nehana ete le'mo bego hi'ahana. 28 Ya hilete enali gukete'a li toba helete golaha kata hupa mone'i li hepi ete'ahana. 29 To ufeha'a hiti nagatu'i kakili'i mone lolo hilete lataha'agu bi ete'ahana. Ya nehite akepa osahi yahi lamaga'aga bilete enalapusa nohi fi emilete kiya yokolo ka ma lite lu ete'ahana: Yuta bona'magihi gihiti bo'ani yale. 30 Ya lite lilete okabaluga libi'na nehete akepa osahi yahi lamaga'aga li binatu lite lataha'alo i'ahana. 31 Enali ya lite kiya yokolo ka li etelete golaha kata li hepi etana li toba nehete ai'a kata'a aku'i li hepi ete'ahana. Ya hilete malipu yafalo halune'mu le'mete bi'ahana yabe.

Yesuhi malipu ho fili'ahana

Mk 15:21-32; Lk 23:26-43; Yn 19:17-27

32 Enali kapo melete nebite Sailini metoga bo gi'a Simoni ai'i be gelete fitu fo etete Yesuhi he'moto malipu yafa'a kofi etobo lago ai kofi he'mo'ehina. 33 Enali hepa'i gi'a mone Gologota yabe luto ni'inalo neheti'ahana. Ana gi'a hapa'amofihi lataha'ani felisa hepa'i yabe lite lilata nehanalo yabe. 34 Ekesa'na hiti li sibi sibi hi'ahana bai nagami'i Yesu nalibe lite emigo nesi'asi nokehelinati aku aku'i no bati mehuse he'mi'ehina yabe.

35 Enali malipu yafalo nekatu Yesuhi ahelete gukete'a guna ito laliti fato fato'i lilune lite masisi suhi hite he'ahana. 36 Ya hilete enali analo nehite Yesu hena hilifi lite ai bota hite mine'ahana. 37 Ifo lataha'aga kaga mone ma lite lilete ka foya emi'ahana kaga fayahi gelete mele'ahana: Ana kaga ma luto leka nesabe: Ya'ma Yesu, Ai Yuta Boana'magi Gihiti Bo'ani Yabe. 38 Yesuhi luga luga ya kegi'a foipa bole loemo malipu yafalo etehe'ahana. Mone bomofihi Yesuhi yahi lamaga'aga nehete mone'amofihi yahi soga'aga he'ahana.

39 Boana'i enali bila ela hanamagi Yesuhi bugu gili gili nehite bai ka ma lite li ete'ahana: 40 Kai mono nohi li tele biloto loegi monegi yegegu aku'i gilube lu'ahata bo, yatai kaika kubuto bi negabe. Kai Hu'mamofihi Pana'a nohutomo malipu yafaloti maga limibo. 41 Ana hite, to sipi mono bomagi hiti to keya kaga enelepilata nehana bomagi hiti olopa bomagi hiti moneko ka lite Yesuhi bai'i emite ma lite li'ahana: 42 Ai luga'a bona'i li enubuto bilata hu'ehina'a huto ai'a li buto mebibe. Yuta bona'magi gihiti bo'animo nohifi fato bo nohibe? Ai malipu yafa he'miloto magu liminogo lali bu goloto o'yo, ai ma'naka luto gihiti bo nohibe lilune. 43 Ai Hu'mamofihi komopa'a emito ai pana'a nohube lulata hu'ehina ai Hu'mau yatai abuto bino. 44 Etali foipa bo loemo Yesuhi luga luga sopaloga etehe'ahana ya'male'i moneko ka lite Yesuhi bai'i emi'aha'ina.

Yesu afili'ehina

Mk 15:33-41; Lk 23:44-49; Yn 19:28-30

p 45 To fuligaha kanalo asaga hepa'i fi metepu i baga ito buto aku'i yege limi folose kanalo i besa lo'ehina yabe. 46 Yege alimi falalina kana'a nohigo Yesu sipi kehe ito ma luto lu'ehina: Eli, Eli, lema sabakatani? Ai ya'mana kaga ma luto lu gelehe nohune: Hu'ma'nigabe, Hu'ma'nigabe, kai hena'mu nohe'mi netane? 47 Ya ligo enali luga'a bona'i ana hepato ho tite nehanamagi ana kaga kehelilete ma lite li'ahana: Ya'ma ai Elaiyahi kehe i noemibe. 48 To bo mone enali folagaha'aniguti ho tito hololu luto buto kosopa ise'na lite bai nagamilugu i pota giloto lito oto akepalo itini noloto Yesu bili tuto nalibe luto emi'ehina. 49 Ya nohigo bona'i luga'amagi li'ahana: He'mi'ohubo. Elaiyau oto he'malifi bu galune'mu nohune lite nelago, 50 Yesu fililube'mu huloto kehe sipi aku'i iloto fili'ehina yabe.

51 Ya higo ana kana'asilo ka'muya sipi mono nonugu hekini lose kata hasalo mele'ahana folaganuguti i hegege huloto ifogati hapi fito si'aga limito i pa so'ehina. To imima'i hiti noligo efahi ibe kolibe huto limi'ehina. 52 To kene mala mala keli i hokolo i baga igo Hu'mamofihi boana'a babu lite koyapa'i fili'ahana yatai aku'i ho ti su he'ahana. 53 Enali kene mala mala hepa'i he'mi su hete nehago alihi Yesu ho tilago li mone hite sipi tauni hepalugu netigo analo babu bona'magi bu enege'ahana yabe.

54 Gimi bomagihi sipi bo'ani analo minoto Yesuto kaba hu'ehina hiti to luga'a bona'i hiti imima'i linana hiti to asaga huto hinana be gelete enelesa'ani gofa ligo ma lite li'ahana: Ma'naka luto ma boya Hu'mamofihi Pana'a nohibe. 55 Babu ana'i Galili hepa'i he'milete Yesuhi he'malune lite mege'i lifite e'ahana anaga mine'ahana. Ya'mana ana'magi foto'i ho tilete nehite gili gili hi'ahana yabe. 56 Enali folagaha'anigu Magatala meluguti a'i mone Malia yabe. To mone Malia Yemesinogo Yosefenogo ito'atitifu yabe. To Sepetihi pana'a loemale'i ito'atitifu hiti mine'ahana yabe.

Yesuhi keli he'ahana

Mk 15:42-47; Lk 23:50-56; Yn 19:38-42

57 Yege limi nofalago fe'noho bo Alimatia hepatogati o'ehina bo gi'a Yosefe, ai ana huto Yesuhi mege'i molomofa'na huto mino'ehina bo yabe. 58 Ai Pailati nohinaga buloto Yesuhi gufa'a lilube luto loka ho'ehina. Ya higo Pailatiu lu epigo gimi bomagi gufa'a ite ete emi'ahana. 59 To Yosefeu Yesuhi gufa'a alito gulu gulu katatu li sa giloto yabe. 60 To yuhufa lolo hu'ehina muli efa kapo'agu gufa'a li bi'ehina. Ya huloto sipi efahi mone li behe behe huto kasiha'alo hekini loloto abufa hu'ehina yabe. 61 Ya nohigo a'i loemale'i Magatala a'i Malia yagi to mone Malia hiti mulito mapahi fite mine'aha'ibe.

Gimi bomagi kene mala mala keli bagalo kaba gimi gi'ahana

62 To Yuta bona'magihi fuli kana ana'ina li tulu huse kana'ani yago'a yabe luto nina asu holago enali sipi mono bona'i hiti to Felosi bona'i hiti Pailati nohinaga li nupa hi'ahana. 63 Ya hilete ma li'ahana: Sipi bo yale, ai fagalo bouba mefili'ohuto kaga mone ma luto lu'ehina lu kimilune. Loegi monegi yupahi minoto'ni aku'i ho tiluna'mu yabe luto lu'ehina. 64 Ya hu'ehinagi kai gimi bonakamagihi kaga litogo bite loegi monegi yupahi minalifa lite kene keli baga'alo amuya melete i hekini leno. Koko pana'amagi faga lite gufa'a gumina lilete asaga boanatoga ai aku'i kene keliguti ho ti'ehibe lite enimi'i mele lalabe. Yatai faga li'ahanauba koyapa'i faga lilanamofihi be ligilibe. 65 Pailatiu ma luto lu epi'ehina: Lenali mono nohi kaba gimi gilata nehana bona'i luga'a bite enele'malo. 66 Ai ya ligo enali bite kene mala mala keli baga'alo ule'ale hite keya'i suhi hite hekini lo bati hi'ahana yabe. To gimi bo luga'a analo kaba gimi gite mine'ahana yabe.